LAOAG CITY – Inpakaammo dagiti agkabsat nga isuda Ms. Denise ken Mr. Danrel Nacnac nga ubingda pay laeng ket namulagatandan iti panagnegosio gapu ta negosiante dagiti nagannak kadakuada.
Segun ken ni Denise, ubing pay laeng isuna ket tumultulong daytoyen iti merkado publiko para iti negosio iti pamiliada.
Inbatadna a sakbay ti pannakaipasdek ti negosioda ket nagsukisokda pay laeng nga umuna no ania ti napintas a negosio nga ipatakderda nga araken dagiti kustomer.
Inlawlawagna a maysa kadagiti kangruaan a kinitada ket ti lugar a pakaipatakderan ti negosioda tapno sigurado met laeng nga asideg ken alisto a makagatang dagiti kustomer kadakuada.
Kabayatanna, kuna ni Mr. Danrel nga ubingda pay laeng ket naimula kadakuadan ti kinapateg ti panagpataray ti negosio no sadinno a tunggal weekends wenno no awan ti serrek iti panagbasada ket agtalinaedda iti puesto ti negosio dagiti nagannak kadakuada tapno makatulong iti pamastrekan ti panagbiagda.
