LAOAG CITY – Napalalo ti buteng ti maysa a balasang ken ti kabsat na a lalaki kalpasan a sinardengan ida ti maysa a nangisit a van a paspasig a lallaki ti nakalugan iti C5 Bridge iti ili ti Sarrat.
Iti interview ti Bombo Radyo Laoag ken ni Maricel Castillo, residente iti Barangay 19 iti ili ti Sarrat, inyistorya na a nagpaitulnog iti kabsat na usar ti tricycle da iti pungto ti daya a paset ti nasao a rangtay paset Dingras Road tapno ditoy nga aguray ti jeep a pagluganan na nga agturong iti ili ti San Nicolas.
Inbatad na a kabayatan ti kaadda da iti nasao a lugar ket adda ti nangisit a van a nangsardeng kadakuada ken atapen da a turista ken agsaludsud laeng dagitoy.
Nupay kasta, kuna ni Castillo nga idi ilukat da tawa iti passenger side ket saan da a nagun-uni no di ket kitkitaen da laeng dagitoy.
Innayon na a nakarikna da ti buteng idi nakita da ti panagsisinninyas dagiti nakalugan ken nangngeg da nga ibagbaga da a lukatan dan ti ridaw.
Gapu iti daytoy, nagbuteng dagiti agkabsat isut gapuna a pinataray a dagus ti ub-ubing a Castillo ti tricycle da nga immadayon iti lugar.
Segun ken ni Castillo, saan na a masinunuo no mano amin ti bilang dagiti nakalugan iti van ngem masigurado na a paspasig a lallaki dagitoy.
Kabayatanna, binalakadan ni Castillo dagiti pada na nga agur-uray kadagiti pagluganan da a pampasahero a jeep a no mapan da agsada ket masapol nga adda latta ti kadwa da.
Innayon na a saanna a masigurado no ania ti motibo dagiti nakalugan iti nangisit a van ngem possible a dakes ti panggep da gapu iti nakita da a garaw da apaman a nagsardeng da iti batog da.
