LAOAG CITY – Sumagmamano nga oras sakbay a masarabo ti baro a tawen ket dua nga indibidual dagiti nagsagaba ti sugat iti nagduduma a paset ti bagi.
Daytoy ket kalpasan ti napasamak a desgrasya iti paset ti Brgy. Sungadan iti ili ti Paoay.
Nabigbig dagiti agkabsat a biktima a ni Sherwin Taroma, agtawen ti 45 ken ni Neil Taroma nga isu ti nangiturong ti naglugananda a kurong-kurong ken agpada dagitoy a residente iti Brgy. Surgui iti ili ti Paoay.
Naamoan a bayat nga agpalaud a direksyon dagiti biktima ket naawanan ti kontrol iti manibela ti driver.
Nagsagaba ti sugat iti ulo ken dadduma a paset ti bagi ti lubbon a ni Sherwin idinto a minor injuries ti sinagaba ti driver a ni Neil.
Agpada a naitaray dagitoy iti Mariano Marcos Memorial Hospital and Medical Center iti siudad ti Batac para iti naan-anay a pannakataming na.
Maipagarup nga adda iti impluwensya ti nasanger dagiti biktima idi napasamak ti insidente ken naggapo dagitoy iti maysa a paggi-inoman.
