LAOAG CITY – Pinaigetan ti panagbantay dagiti Barangay Officials, kameng ti Philippine National Police pakairamanan dagiti Barangay Tanod iti Sitio Karuked ti Brgy. 23, San Matias ditoy ciudad ti Laoag.
Daytoy ket kalpasan nga adda dagiti maipagarup a naglibas iti nasao a Sitio a napan iti Brgy. 11, Sta. Rosa iti ili ti Sarrat.
Segun iti Hepe ti Barangay Tanod a mannarimaan nga agbanbantay ita a gundaway a ni Brgy. Tanod Pacifico Rey Salvador, saan pay a nalawag kenkuana daytoy a banag ngem inadmitir na nga adda ti maipalpalapayag kenkuana mainaig iti daytoy a banag.
Inbatad na a kinumpirmaran ni Brgy. Kagawad Arnel Ganotisi, akin-sektor iti nasao a Sitio nga agnanaed dagiti residente a maibagbaga a maipagarup a naglibas.
No pay kasta, saan da pay masinunuo no ania ti kabuklan daytoy a banag.
Mainaig iti daytoy, kinumpirmaran ni Brgy. Chairman Richard Agpaoa ti Brgy. 11, Sta. Rosa iti ili ti Sarrat a dagusda a pinasubli dagiti agasawa ken ti anakda nga agtawen ti dua kalpasan a naammoanda nga addada iti Barangayda idi malem ti Lunes.
Kunana a simmangpet iti Barangay da dagiti agkakapamilia idi bigat ti Lunes.
Inlawlawag na a daytoy ket addangda tapno maliklikan ti panagamak dagiti kabaranggayanda.
Inpakaammo na a dumalan ita nga aldaw ti babai iti swab test idinto a saan na a masinunuo no inton kaano met a dumalan ti lalaki ken ti ubing.
Naammoan a residente ti Brgy. 23, Sitio Karuked iti Siudad ti Laoag ti lalaki idinto a taga Brgy. 11, Sta. Rosa iti ili ti Sarrat ti babai.
Maipalagip a naipatungpal ti lockdown ti Sitio Karuked ti Brgy. 23 ditoy Siudad ti Laoag idi malem ti Domingo.
Mainaig iti daytoy, inlawlawag ni Brgy. Kagawad Arnel Ganotisi, akin-sektor iti nasao a Sitio, rimuar ti Sitio Karuked dagiti agkakapamilia sakbay pay a naipatungpal ti lockdown iti nasao a Sitio.
Kunana nga idi bigat ti Domingo ket napan dagiti agkakapamilia iti ili ti Solsona tapno agpasiar ken kalpasanna ket nagturongda iti Brgy. 11, Sta. Rosa iti ili ti Sarrat no sadino a taga ditoy ti babai.
Inbagana a saan met ammo dagiti agasawa a ma-lockdown ti Sitio a pagnanaedanda idi malem ti Domingo.
Patien ti Brgy. Kagawad a gapu iti daytoy napasamak ket arigna ket nakapasar ti diskriminasion dagiti agkakapamilia nangruna ket idi intulodda dagitoy iti Sitio Karuked manipod iti Brgy. 11, Sta. Rosa ket maipagarup a maysa kadagiti nangitulod kadagitoy ket nagsao ti “saanyo nga as-asitgan isuda ket adda COVID-da.”
Kabayatanna, segun ken ni Mr. Marvin Ganal, Local Disaster Risk Reduction and Management Officer II iti ili ti Sarrat nga awan ti kinapudno na nga adda ti naibaga da a saan a napintas kadagiti agkakapamilia idi intulod da dagitoy.
