LAOAG CITY – Manamnama a mapilaan ti kaso nga adultery dagiti agkamalala a naaktuan nga agkanaig iti maysa a lodging house ditoy siudad ti Laoag.
Segun ken ni Lt. Col. Mar Louise Bondoc, ti hepe ti PNP-Laoag, mismo a kayong ti babai a natiliw ti nakakita a simrek daytoy iti lodging house kadua na ti kamalala na.
Gapu iti daytoy, inpakaammo ti kayong na iti mismo nga asawa na ti nakita na ken dagus met a dimmawat ti tulong iti PNP.
Kuna n Bondoc a bayat ti panagresponde da ket naaktuan nga agkainaig dagiti dua.
Inbatad na a ginandat ti lalaki ti naglibas ken nagtaray agingga iti rooftop ti lodging house ngem nakemmeg dagiti otoridad.
Naamoan a dagiti natiliw ket agpada nga agnanaed iti ili ti San Nicolas ngem ti lalaki ket tubo iti Magsingal, Ilocos Sur.
Iti agdama ket nagtalinaed iti kustodyar ti PNP-Laoag dagiti maseknan bayat a maisagsagana ti maipila a kaso kontra kadakuada.
