LAOAG CITY – Balligi a naarestar dagiti dua nga agkasinsin iti ili ti Dumalneg kalpasan ti 17 a tawen sipud naiserbi ti warrant of arrest gapu iti kaso a panagsalungasing ti PD 704 wenno iligal a panagkalap.
Daytoy ti inpakaammo ni PLt. Jimmy Aganon, ti hepe ti PNP iti nasao nga ili.
Kuna ni Aganon a dagiti suspek ket agtawen ti 56 ken 52 ken agpada dagitoy a residente iti Brgy. Calao iti nasao nga ili.
Inbatad na a tawen 2005 pay laeng idi naipila ti kaso ken naiparuk-at ti warrant of arrest babaen iti RTC Branch 19 iti ili ti Bangui.
Narekomendaran dagiti suspek ti 12 a ribo a pisos a piyansa para iti temporaryo a pannakawaya-waya da.
Nu pay kasta, nagtalinaed dagitoy iti kustodyar ti PNP-Dumalneg ken manamnama a maidatag dagitoy iti korte a naggapoan ti warrant of arrest.
