LAOAG CITY – Adda ti panagkurang ti suplay ti asin gapu iti nakurang a mausar a pagtungo.
Daytoy ti inbatad ni Mrs. Baby Garcia, agtagikua ti maysa a salt refinery iti Brgy. Estancia iti ili ti Pasuquin.
Segun ken ni Garcia, agkurkurang ti suplay ti taep nga isu ti kangrunaan a mausar a pagluto iti asin.
Mainaigit iti daytoy, kuna na a gapu iti daytoy ket adda ti apagapaman a panagngina ti presyo.
Inpakaammo na nga uray ti imported a rock salt a mailaok iti maaramid nga asin ket ngimmina rason nga apektado ti suplay ken presyo ti mailaklako ditoy probinsya.
Iti agdama, kuna ni Garcia a ti dati a 100 a pisos a presyo iti kada lata ti asin ket umaboten iti 130-150 a pisos.
Kabayatanna, inbatad ni Garcia nga iti uneg ti 30 a tawen a panagaramid da ti asin ket awan pay ti naawat da nga aniaman a suporta manipod iti gobierno.
