LAOAG CITY – Inlawlawag ni Ms. Susan Gagarin, mangidadaulo iti Land Transportation Office ditoy siudad ti Laoag, nga idi napan a tawen nakaawatda iti order manipud iti nangatngato nga opisina ti Land Transportation Office.
Segun ken ni Gagarin, mabalin a masuspenso dagiti violators iti innapropriate driver’s license code iti maysa a tawen ken mamulta, nangruna dagiti agus-usar iti saan nga umiso a driver’s license code.
Agdagup iti P3,000 ti multa malaksid pay iti maysa a tawen a pannakasuspende ti lisensia.
Innayonna a naka-link iti Land Transportation Office ti rekord dagiti driver’s license code, isu a saan a mabalin a basta agsalungasing dagiti motorista.
Kinunana a naiget ti pannakaipatungpal ti opsinada ti multa ken pannusa tapno masigurado ti kinatalged ti kalsada.
Namunganay daytoy nga isyu kalpasan nga adda ti nagkamang ditoy station ti Bombo Radyo Laoag, maysa a driver a natiliw gapu ta saan a maiyannatop ti driver’s license code na iti minaneho a lugan.
