LAOAG CITY – Naarestar ti maysa a baro kalpasan aa nagtakaw ti cellphone iti sango ti Cockhouse iti Barangay 8 ditoy ciudad ti Laoag.
Nabigbig ti suspek a ni Harold Dave Meram Constantino, agtawen ti 22, baro, aglaklako ti karne ti baboy iti merkado publiko ditoy ciudad ken residente iti Barangay 1 ditoy ciudad.
Iti report, agawid koman ti biktima a ni Francis Chantioco Pacubas, agtawen ti 22 ken taga Barangay 46, Nalbo ditoy ciudad idi nadlaw na nga awan ti Iphone 7 Plus na nga agmaris ti nangisit nga agbalor ti 48,600 a pisos.
Gapu iti daytoy, pinadas na a tinawagan ti cellphone na ngem saanen nga agring agingga a maysa nga empleado ti bar ti nangibaga a nakita na ti suspek a nangala iti cellphone na.
Iti insayangkat nga hot pursuit operation dagiti otoridad ket nakita da ti suspek iti sirok ti Gilbert Bridge ngem saanen a mabalin ti cellphone gapu ta tinaltal nan daytoy.
Mainaig iti daytoy, inlawlawag ti suspek a bayat iti kaadda na iti cockhouse tapno mapanna masahanyen ti security guard ti nasao a bar ket dita a nakita na ti nabati a cellphone iti lamissan ket ditoy nga innala na.
Kalpasanna ket napan iti sirok ti rangtay ket ditoy na a tinaltal iti cellphone babaen ti bato.
Disidido met ti biktima nga agpila ti reklamo kontra iti nasao a suspek.
