LAOAG CITY – Nasakit ti rikna ni Mrs. Elsie Deluna, aglaklako ti nateng a residente iti Barangay San Juan iti ili ti Pasuquin iti maipagarop a panangpabain kenkuana ti inspector iti modernized jeepney nga addaan ti ruta a Laoag-Bacarra-Pasuquin.
Segun kenni Deluna, agturong ditoy ciudad ti Laoag ngem idi adda iti sakopen ti Bacarra ket adda ti inspector a binigbig na a ni Mr. Peping Dumlao.
Inlawlawag na sinaludsod ni Dumlao no siasinno ti akin-kukua iti bawang ken papay ken idi inbaga ni Deluna nga isuna ti akin-lako kadagitoy ket dinakamat ni Dumlao a rumbeng a maipan iti garbage bag gapo ta nabangsit nangruna ket air-conditoned ti lugan.
Kuna ni Deluna a nagpadespensar kenni Dumlao ngem naskit ti rikna na iti maipagarop a dinakamat ti inspector a saan da a pagkurkurangan dagiti aglaklako ti nateng nga ilugan.
Kalpasan daytoy, rumrumuar pay a binagaan ni Dumlao ti driver a no kastoy ti karga ti pasaheros ket saan da nga agiluglugan.
Naamoan a kanayon met nga adda ti bawang wenno lasona bayat ti panaglugan na iti modernized jeepney ngem ita laeng a gundaway a napabainan.
Mainaig iti daytoy, desidido ni Deluna a mangipila ti reklamo kontra kenni Dumlao.
