LAOAG CITY – Agingga laengen intono katapusan ti panaglako kadagiti talipapa ditoy ciudad ti Laoag.
Daytoy ti inbatad ni Mrs. Antonette Bareng, ti mangidadaulo iti Business Permit and Licesing Office (BPLO) ditoy ciudad.
Segun ken ni Bareng, mangrugi iti sumaruno a tawen ket awanen dagiti aglako pay kadagiti talipapa ditoy ciudad.
Kuna na a nakasarita dan dagiti aglaklako kadagiti talipapa maipanggep iti daytoy a banag.
Innayon na a maawatan ken awan ti panagkedked dagiti maseknan nga aglaklako iti mandar da.
Maipalagip a naipalubos ti panaglako kadagiti talipapa ditoy ciudad ti Laoag kalpasan a naipatungpal ti Enhanced Community Quarantine (ECQ) a gubuay ti covid-19 pandemic, ngem gapu ta napalukayanen ti protocols ket naikkan laeng ti pawayway dagiti maseknan nga aglako agingga ti panagngudo ita a tawen.
