LAOAG CITY – Inpakaammo ni PMaj. Vencioly Luzano, ti hepe iti PNP-Pasuquin a naiyuswat a search warrant operation iti maysa a pagtaengan iti Brgy. San Isidro iti nasao nga ili.
Binigbig ni Luzano ti subject ti operasyon a ni Cedrick Planta y Merciales, agtawen ti 29, addaan ti live-in partner ken residente iti nasao a barangay.
Kuna ni Luzano a nailanad iti search warrant a nasken a mabirok ti maysa a caliber 38 a paltog.
Kabayatanna, inpakaammo na a sakbay a mangrugi ti operasyon ket nagsubli iti uneg ti live-in partner ti subject a ni Cherillyn Tabrilla y Pinacte ken nagbayag sakbay a rimuar iti likod a paset ti pagtaengan da.
Kuna ni Luzano a dita a nakita dagiti nakabantay a agarup 30 a metro ti kaadayo na manipod iti pagtaengan nga adda ti inpurwak ti live in partner.
Inbatad na a bayat ti panagsukimat da ket dita a naduktalan a ti paltog a mabirbirok ti naipurwak iti ruar ti pagtaengan.
Naamoan nga addan namintallo a daras a narespondean ti subject gapu iti panagpappaputok na ti paltog.
Mainaig iti daytoy, inpakaammo pay ti hepe nga addan ti dati a kaso a nakairamanan ti subject kas iti panagtatakaw ken carnapping.
Kabayatanna, kuna ni Luzano nga inadmitir met ni Planta nga adda iti ikot na a paltog ken saan a nagresistir idi naiyuswat ti operasyon.
Agpada a nagtalinaed iti kustodyar dagiti otoridad dagiti aglive-in partner.
Manamnama a mapilaan ti kaso a panaglabsing iti RA 10591 wenno Illegal Posession of Firearms ni Planta idinto nga Obstruction of justice met iti live-in partner na.
