LAOAG CITY – Balligi a naarestar ti aglive-in partner iti ili ti San Nicolas gapu iti panaglabsing da iti Republic Act No. 9165 wenno Comprehensive Dangerous Drugs Act of 2002.
Nabigbig ti suspek a ni Jay Ar Cabigun, agtawen ti 30, driver, residente iti Barangay 16 iti nasao nga ili ken tubo idiay Mindanao, idinto a ti live-in partner na ket ni Marietta Alfonso Barioga.
Apaman ti naiwayat nga operasyon ket limmaban ti suspek, no sadinno a nagusar daytoy iti calibre 45 a paltog ken immuko.
Sakbay pay iti daytoy ket naglemmeng pay ti suspek iti uneg ti CR, no sadinno a rinakrak dagiti kameng ti otoridad ti ridaw ti naglemmengan na.
Mainaig iti daytoy, nagpasar ti suspek iti sugat, ken insigida met a naitaray iti ospital apaman a naposasan.
Naglikudan met ni Barioga nga aglaklako ken agus-usar da ti ilegal a droga iti live-in partner na.
Kabayatanna, inpakaammu met ni Barangay Kapitan Federico Simpliciano iti nasao a barangay a nabiit pay nga agup-upa ti kasera ti aglive-in partner iti lugar da.
