LAOAG CITY – Natiliw dagiti aglive-in partner gapu iti panaglabsing da iti Presidential Decree (PD) No. 603 wenno ti The Child and Youth Welfare Code ken Anti-violence Against Women and Their Children Act 2004 ditoy ciudad ti Laoag.
Daytoy ti inbatad ni Police Chief Master Sergeant Eric Bumagat, ti Duty Desk Officer ditoy ciudad.
Nabigbig dagiti akusado nga isuda Robert Genovea y Ventura, agtawen ti 20, delivery boy ken ti live-in partner na a ni Dianne Angelica Bagaoisan, agtawen ti 20, agpada a residente iti Barangay 6, San Agustin ditoy ciudad.
Segun ken ni Bumagat, natiliw dagiti aglive-in partner babaen ti bileg ti warrant of arrest nga inparuk-at ni Assisting Judge Bonjover Vergara Bernardes iti RTC Branch 11 ditoy ciudad ti Laoag.
Nairekomendar ti 24 a ribo a pisos a pagpiyansa dagiti aglive-in partner iti kada kaso da.
Namonganay ti pannakaireklamo dagiti dua kalpasan a naduktalan ti lola ti agtawen ti 3 nga anak ti lalaki nga adda dagiti sinit ti nagduduma a paset ti bagi ti ubing.
