LAOAG CITY – Balligi a natiliw dagiti aglive-in partner iti naiyuswat a drug buy-bust operation iti Barangay 30-B, Sta. Maria ditoy ciudad ti Laoag.

Binigbig ti Philippine National Police ditoy ciudad ti Laoag dagiti aglive-in partner nga isuda Mr. Edwin Suyat, agtawen ti 41, construction worker ken Jeniffer Flores, agtawen ti 28, agpada nga agnanaed iti barracks iti maar-aramid a bypass bridge iti nasao a barangay.

Natiliw dagiti suspek gapo iti panaglako ti maysa a sachet ti maipagarop a shabu iti balor a 1,500 pesos iti police poseur buyer.

Inbatad ti Philippine National Police nga amin a nakumpiskar nga iligal a droga ket agdagsen iti 3 a gramo ken agbalor iti 20,400 pesos.

Naamoan a dagiti suspek ket maibilang nga street level individuals iti Drug Watchlist ti Philippine National Police.

Mainaig iti daytoy, naglikudan dagiti suspek a naglako da ti iligal a droga ngem inadmitir ni Suyat nga nga agus-usar ken ti naudi a panagusar na ket idi Domingo kadua na ti live in partner na.

Kabayatanna, mapilaan ti kaso a panaglabsing iti Republic Act 9165 wenno Comprehensive Dangerous Drugs Act of 2002.