LAOAG CITY – Natiliw dagiti aglive-in partner itay parbangon kalpasan ti inyuswat nga entrapment operation dagiti kameng ti Philippines National Police (PNP) idiayBarangay Nanguyudan, Paoay, Ilocos Norte.
Nabigbig dagitoy a da Mary Arleen Abucay y Gallego, agtawen iti 47, balo, negosyante ken ni Sonny Boy Aneona y Epipanio, agtawen iti 33, live-in partner ni Abucay, agpada dagitoy a residente ti nasao a barangay.
Daytoy ket kalpasan a naaktwan dagiti otoridad ti maipagarop a panagibugaw da ti biktima nga agnagan iti Cristina Villanueva, agtawen iti 38, naasawaan, residente iti Barangay Better Life Subdivision, Cavite iti maysa a pulis a nagpammarang a kliyente kasukat iti 1, 500 a pisos.
Nakumpiskar dagiti otoridad iti ikot dagiti suspek ti 1,500 a pisos a nausar iti operasyon, sumagmamano a cellphone, cash a personal a kwarta dagiti aglive-in partner ken dadduma pay.
Iti agdama, maisagsaganan ti kaso nga Anti-Trafficking in Persons Act wenno RA 9208 a maipila kontra kadagiti aglive-in partner a suspek.
