LAOAG CITY – Saan pay a nakasagana a mangipaay ti statement wenno reaksion ni Mr. Cipriano Perry Martinez ti Acting General Manager ti Ilocos Norte Electric Cooperative pakaseknan kadagiti reklamo a maibatbato kontra kenkuana.
Segun kenkuana, daytoy ket kalpasan a saanna pay a pormal a naawat ti kopya ti reklamo kontra kenkuana maipanggep kadagiti maipagarup a saan a nainkalintegan nga ar-aramidenna kabayatan ti panangidaulona iti kooperatiba.
Nupay kasta, inbatadna nga ammona maipapan iti daytoy a banag babaen iti panangipakaammo ti National Electrification Administration kenkuana.
Inlawlawagna a basar iti inisyal nga impormasionna, daytoy ket maysa nga administrative complaint nga inpila dagiti agnagan ti Shirley Salinas, Regelyn Orcino ken Manuel Flora.
Mainaig iti daytoy, kuna ni Martinez nga uray saanna pay a naawat daytoy a reklamo ket addan ti pannakisarsaritana kadagiti abugadona ken manarimaanen ti panangisaganada ti agbalin a sungbatda kadagitoy apaman a maawatda ti reklamo.
Inpettengna a kalikagumda a mangipila ti counter criminal charges kadagiti complainant ngem saanda a maaramid ti agdama dagitoy agingga a saanda pay naawat ti nasao a reklamo.
Kabayatanna, inpanamnama ni Martinez nga iti kabiitan a panawen ket sungbatanna dagitoy nga akusasion.
