LAOAG CITY – Inyestoria ti agmaymaysa a survivor iti plane crash idiay India no kasano daytoy a milagro a nakaruar manipud iti wreckage ti eroplano.
Segun ken ni Vishwash Kumar Ramesh, agtawen ti 40 ken British national a manarimaan nga agpapaimbag iti ospital, idi nakapuot daytoy ket nakitana dagiti naruay a pasahero ken flight attendant a pimmusayen.
Naaramidna a makaruar iti babaen ti puersa a pananglukatna iti nadadael nga emergency exit door nga apagapaman a nakalukat idi nga asideg laeng iti pagtugtugawanna iti seat 11A ti Air India Boeing 787 Dreamliner.
Inlawlawagna a saan a limmagto isuna gapu ta adda iti ground idin ti eroplano isu a nagna laeng daytoy a rimmuar ti emergency exit.
Kunana a saan unay a dakkel ti apoy iti paset ti eroplano no sadinno a nakatugaw isuna idi nagsuek daytoy iti ground ngem idi nakaruar daytoyen manipud iti eroplano ken naan-anayen a bimtak.
Nagsagaba ti sugat ni Ramesh iti akinkannigid nga abagana gapu iti uram.
Linagip met ni Ramesh nga alisto ti napasamak gapu ta 30 a segundo pay laeng kalpasan a nagtake-off ti eroplano ket adda dagiti nariringor agingga a nagsuek ti eroplano.
Naammoan a ni Ramesh ket agsubli koman idiay United Kingdom kaduana ti kabsatna idi napasamak ti aksidente ngem karaman ti kabsatna iti 241 a pasahero ken crew a natay iti aksidente.
Kabayatanna, kuna ni Dr. Rajnish Patel, ti mangidadaulo ti surgery iti Ahmedabad Civil Hospital a ti survivor iti plane crash ket saan a kritikal ti kasasaad ni Ramesh ken mabalinen a ma-discharge iti ospital kadagiti sumarsaruno nga aldaw.
