LAOAG CITY – Agtultuloy nga umad-adu ti bilang dagiti mannalon ditoy probinsia nga agmulmula iti High Value Crops no maidasig kadagiti agmulmula iti pagay.
Daytoy ti kinumpirmaran ni Engr. Chonito Baldobi, ti Officer In Charge iti Provincial Agriculture Office.
Inbatadna a daytoy ti nagbalin a resulta iti agtultuloy a panagngato iti presio dagiti kasapulan iti panagtalon ken iti nababa a presio iti irik ti merkado publiko.
Kunana a ti pannakaitandudo iti panagmula iti High Value Crops iti ipangpangruna iti agdama iti gobierno probinsial.
Inlawlawagna a daytoy ket irekrekomendarda kadagiti umili nangnangruna kadagiti makapaspasar iti epekto ti El Nino phenomenon.
Kunana nga iti panagmula iti High Value Crops ket al-alisto a dumakkel dagiti maimula, bassit ti danom a kasapulan ken dakdakkel iti maganansiada.
Mainaig iti daytoy, inpettengna nga uray adun dagiti agmulmula iti High Value Crops maidasig kadagiti agmula ti pagay ket saan a maapektaran ti rice production ditoy probinsia gapu ta nangato ti sufficiency level ti pagay.
Innayonna a no adda dagiti mannalon a kalikagumna nga umakar iti panagmula ti High Value Crops ket adda iti maidiaya a training babaen iti Provincial Agriculture Office iti pannakikammayet iti Agriculture Training Institute.
