LAOAG CITY – Manamnama nga umadu dagiti mapan agpaaramid ti parol kadagiti Persons Deprived of Liberty wenno dagiti balod ti Bureau of Jail Management and Penology ditoy siudad ti Laoag inton bulan ti Nobiembre.
Daytoy ti inpakaammo ni Jail Inspector Shiela Marie Sapaden, mangidadaulo iti nasao a pangopisinaan.
Segun kenkuana, posible a dagiti kangrunaan nga agpaaramid ti parol ket manipud kadagiti pagadalan, restaurant ken dadduma pay nga isu ti agserbi a dekorasion dagitoy inton paskua.
Inbatadna a dagiti maseknan ti mangitugot kadagiti masapol a ramit ken ibagada laeng kadagiti balod no ania a disenio ti kalikagumda nga ipaaramid a parol.
Inlawlawagna a dagiti maawat a tandang dagiti balod ket maipaay met laeng kadakuada tapno adda latta ti maiyawatda iti pamiliada iti baet nga addada iti uneg ti pagbalodan.
