LAOAG CITY – Balligi a naarestar ti agpagayam iti naisayangkat nga anti-illegal drug buy bust operation iti Barangay 4 ditoy ciudad ti Laoag, partikular iti Laoag Badoc-Bus Terminal.
Nabigbig dagitoy a da Jerremy Gasmen Go, awanan asawa, agtawen ti 47, agtrabtrabaho iti Baguio City ken residente iti Barangay 1, iti ili ti Pagudpud, idinto a ti kadwa na ket nabigbig a ni Jennifer Vallente Agtagma, maysa a mannalon ken residente iti Barangay 6, iti ili ti Bangui.
Iti naisayangkat nga operasyon, nakumpiskar dagiti otoridad ti maysa a heat sealed transparent plastic sachet a naglaon ti maatap a shabu iti babaen ti nagpammarang a pulis puseur buyer.
Malaksid iti daytoy ket nakumpiskar pay manipud ken ni Go ti maysa nga improvised glass tube tooter a naglaon iti maatap a shabu idinto a ti laeng naala ken ni Agtama ket empty plastic sachet ngem kunana a napidot na aeng daytoy.
Basar iti palawag dagiti suspek, nagturong da ditoy ciudad ti Laoag gapu ta napan da nakipaskua iti kabagyan da.
Mainaig iti daytoy naammuan nga under probation ni Go idiay Baguio City nga isu ti pagtrabtrabahoan na kas maysa nga helper iti panganan.
Kabayatanna, inpakaammu dagiti otoridad a maibilang nga Street Level Individual ni Go.
