LAOAG CITY – Inbasura dagiti agpanpanday linteg idiay Nigeria ti nailungalong a gakat a gagem na a maipaayan ti bileg dagiti babbai ken intadudo ti gender equality.
Napilitan ni Senador Biodun Olujimi manipod iti Ekiti State a nangibabawi iti draft ti gakat kalpasan a nagkedked dagiti kakadwa na a lallaki iti maibilang kas “socio-cultural ken Islamic concerns”.
Inadmitir na a nasakit daytoy para kadagiti babbai gapu ta kasapulan pay laeng a makilaban iti ado nga isyu iti proseso iti panagaramid iti linteg para iti nasao a banag.
Innayon na a gagangay nga ado dagiti mabuteng a maikkan ti bileg dagiti babbai gapu iti kultura iti nasao a pagilyan.
Nupay kasta, inpasingked na a saan a sumuko a mangilaban iti karbengan dagiti pada na a babbai.
