LAOAG CITY – Natay ti maysa nga agpanpanday linteg idiay Zimbabwe a nabigbig a ni Desire Moyo kalpasan a naidungpar iti elepante.
Basar iti imbestigasion, kabayatan a dumaldalyasat ti naglugan ti biktima kaduana ti uppat a dadduma pay iti paset ti Bulawayo-Gweru highway ket kellaat a nadungparda ti elepante.
Gapu iti daytoy, insigida a pimmusay ti biktima idinto a dagiti padana nga agpanpanday linteg ket nagsagaba ti sugat iti nagduduma a paset ti bagida.
Mainaig iti daytoy, naruay ti nangipaay ti panangsaludar iti maibilang a nalatak pay a poet nga addaan ti kontribusion iti benneg ti arts a natay sakbay ti maika-46 a panagkasangayna.
Naammoan a miembro ti biktima iti Citizens Coalition for Change nga idadauloan ni Nelson Chamisa ken nagserbi iti Zimbabwean parliament’s sport, recreation, arts and culture committee.
Kabayatanna, inbatad ni Mayor David Coltart iti siudad ti Bulawayo a ni Moyo ket malagip kas maysa nga iconic leader.
