LAOAG CITY – Inpakaammo ni Dr. Loida Valenzuela, Provincial Veterinarian a nairekomendar iti Office of the Governor ti agpapada a presio ti karne ti baboy ditoy probinsia.
Segun kenkuana, daytoy ti maysa kadagiti insingasing kadakuada ti hog raisers group tapno maymaysa ti presio ti pannakailako ti karne ti baboy sadinnoman nga ili wenno siudad ditoy probinsia.
Inbatadna a nailungalong daytoy nga addang kalpasan a naobserbaran nga adda dagiti lugar ditoy probinsia a nalabes unay ti kinangina ti presio ti karne ti baboy kas ditoy siudad ti Laoag.
Inlawlawagna a mabalin met nga ipababa ti presio dagiti meat vendors nga aglaklako iti Laoag City Public Market and Commercial Complex dagiti ilaklakoda a karne ti baboy gapu ta dakkel ti gidyat ti presiona no idasig kadagiti dadduma nga ili wenno siudad.
Kunana a nasaysayaat no ipababa ti presio ti karne ti baboy ditoy probinsia nangruna ket kaadoan a Local Government Unit ket maibilangen a first class municipality.
Naammoan a ti presio ti liveweight iti karne ti baboy iti ili ti Pinili ket 200 a pisos iti kada kilo, 290 a pisos iti kada kilo iti siudad ti Batac idinto a sumurok 300 a pisos iti kada kilo ditoy siudad ti Laoag.
Kabayatanna, mangnamnama ti Provincial Veterinarian a mapagnunumoan a naimbag ti panagpresio ti karne ti baboy kadagiti nagduduma nga ili ken siudad ditoy probinsia para iti pagsayaatan dagiti naruay nga umili.
