LAOAG CITY – Agpapada ti mangmanggeg manipud kadagiti matiltiliwan iti drug buy bust operation a planted dagiti makumpiskar kadakuada a droga.
Daytoy ti sungbat ni SPO3 Harold Nicolas iti PNP-Laoag iti alegasyon ni Mr. Alvin Tino a naimula ti maipagarop a naala a shabu kenkuana.
Immuna iti daytoy, naiwayat ti operasyon iti mismo pagkaseraan ni Tinio iti paset ti Barangay 5 ditoy ciudad ti Laoag.
Segun kenni Nicolas, karbengan dagiti tattao a mangipila ti kaso kontra iti inwayat da nga operasyon no sadinno a kuna ti agtagikua ti pagkaseraan a nakasagana nga agtestigo a planted dagiti ebidensya a naala kenni Tinio.
Inbatad na a nakasagana da met a mangsango wenno mangsungbat iti anyaman a maipila a reklamo kontra kadakuada a nangiwayat ti operasyon.
Naamoan a ni Tinio ket drug surenderer ditoy ciudad ti Laoag itay napan a tawen ken nabayagen a sipsiputan dagiti otoridad.
Innayon na a naikkat kadagiti nagbalin a trabaho na kas driver ti bus gapo iti panagpositibo na iti iligal a droga.
