LAOAG CITY – Agpapada ti pundo a maipaay kadagiti amin a barangay ditoy probinsia manipud iti bingay ti probinsia iti RA 7171.
Daytoy ti inpakaammo ni Ms. Katrina Agulay, Administrative Officer 3 ti Office of Barangay Affairs kalpasan nga adda manen ti naawat ti probinsia a bingayna iti excise tax ti tabako.
Inbatadna nga iti agdama ket adda ti 17 a barangay a manarimaan ti pannakaiproseso ti pannakaipaay ti maysa a milyon a pisos iti tunggal maysa nga usarenda kadagiti kangrunaan a proyekto dagitoy iti uneg ti barangay kangrunaanna iti Farm to Market roads.
Kunana a daytoy ket napundoan pay laeng manipud iti bingay ti probinsia iti RA7171 idi tawen 2022.
Kabayatanna, kunana a dagiti maipaayan ti pundo a barangay iti kaudian a naawat ti probinsia a bingayna iti RA 7171 ket dagiti barangay a saan pay a naikkan ti pundo.
Nupay kasta, inlawlawagna a sakbay a maipaayan dagitoy ti pundo ket masapul a maammoan nga umuna no ania dagiti prioridad dagitoy a proyekto a kalikagumda a maipatungpal iti uneg ti barangayda.
Mainaig iti daytoy, inlawlawagna a maisayangkat ti pannakitaripnong ti OBA iti Liga ng mga Barangay inton bigat tapno ammoenda no ania dagiti kangrunaan a proyekto a kalikagumda a maipatungpal.
Inpettengna a malaksid iti panangisubmitir dagiti maseknan kadagiti prioridad a proyekto ket maipresentar kadakuada ti “barangay data sheet” a naglaon kadagiti “basic information” iti barangay a pagibasaran met kadagiti prioridad a proyekto a maala kadagitoy.
Innayon ni Agulay a karaman kadagiti prioridad a proyekto a pakausaran ti pundo ket Farm to Market Roads, pannakapasayaat dagiti multi-purpose hall ken mabalin a mausar ti pundo iti aniaman a proyekto a maiyallubog kadagiti proyekto a naikeddeng a pakausaran ti pundo a nailanad iti “guidelines” ti RA 7171.
