LAOAG CITY – Inpakaammo ni Laoag City Vice Mayor Vicentito Lazo a maarisit a naimbag ti listaan dagiti household nga umawat ti sag-1,000 a pisos ditoy siudad ti Laoag.
Daytoy ket kalpasan a naaprobaran ti naamendaran a resulosyon seknan ti pannakaibunong ti tulong pinansyal kadagiti rebbeng na a maikkan.
Inlawlawag ni Lazo a ti maikkan ti tulong pinansyal ket dagiti awan pulos ti pamastrekan na kabayatan ti enhanced community quarantine gapu iti COVID-19.
Umaboten ti nasurok 10 a ribo nga household ti naisumitir dagiti 56 a barangay ditoy siudad agraman dagiti sangaribo a barangay tanod a maikkan ti tulong pinansyal.
Nupay kasta, agtultuloy pay laeng ti panangarisit dagiti maseknan no siasinno dagiti rumbeng a maikkan ti tulong pinansyal ditoy siudad ti Laoag.
