LAOAG CITY – Inpakaammo ni Mayor Albert Chua a manamnama nga adda ti maipasdek nga Agricultural Trading Post wenno bagsakan kadagiti mailako a produkto iti asideg ti merkado publiko iti Siudad ti Batac.
Segun kenkuana, adda ti nagatang ti lokal a gobierno nga agarup sangapulo nga ektarya a pakaipasdekan ti Bagsakan Center wenno lugar a pakaikabilan dagiti produkto manipod kadagiti nagduduma a producers ti Siudad.
Inbatadna a babaen iti daytoy a wagas ket mapaalisto dagiti mapan gumatang ti binulto wenno dagiti adu unay ti gatangenda a produkto.
Inlawlawagna nga iti agdama ket manarimaanen ti panagtulag iti nagbaetan ti lokal a gobierno iti Siudad ti Batac ken ti gobierno probinsial ti Ilocos Norte seknan iti naan-anay a pannakaipatungpal ti nasao a proyekto.
Inbunannagna a mismo ni Gob. Matthew Marcos Manotoc ti nagkiddaw iti National Government a maaddaan ti City Government of Batac ti bukud a Trading Post nga imanihir ti dua a Local Government Unit tapno agbalin a napintas ti panagoperar ti nadakamat a proyekto.
Kabayatanna, kuna ni Mayor Chua nga adda pay ti plano ti lokal a gobierno ken ti gobierno probinsial a mangiyestablisar ti Central Terminal para kadagiti tricycle, jeepney ken bus terminal nga asideg met laeng iti daga a nagatang ti Siudad.
Innayonna nga amin dagitoy a proyekto ket masirsirmata a maiyimplimentar iti kabiitan a panawen.
