LAOAG CITY – Inpasigurado ni Mrs. Rubylyn Pacyaan,Agriculture Officer iti ili ti Piddig nga agtubo dagiti inbunong da a bin-i kadagiti mannalon ngem nabaybayag laeng.
Sungbat daytoy ni Pacyaan kalpasan nga adda ti dimmanon a reklamo ditoy Bombo Radyo Laoag a saan a nagtubo dagiti inbunong da a bin-i nga addaan ti variety a TH82 ken triodos.
Iti pannakiinuman ti Bombo Radyo ken ni Pacyaan, inlawlawag na a ti panagdakkel ti naimula a bin-i ket agdepende iti panangsurot ti procedure para iti pannakaimula dagitoy.
Inpasingked met ni Pacyaan a nakasagana a mangsungbat kadagiti mannalon no adda dagiti kayat da a mapan damagen maipanggep iti inbunong da a bin-i.
Kabayatanna, inbaga met ti maysa a mannalon a ni Mr. Emmanuel Pablo iti ili ti Piddig nga awan ti nagbalin a problema na iti naawat na a bin-i gapu ta napintas met ti panagtubo da.
Innayon na a no saan nga agtubo ti bin-i dagiti dadduma a pada na a mannalon ket mabalin a saan da a sinurot ti procedure nga inbaga ti Department of Agriculture (DA).
