LAOAG CITY – Nagikkat iti puesto ni Agriculture Undersecretary Leocadio Sebastian kalpasan a naibulgar ti saan nga otorisado a plano a panagangkat kuma ti 300,000 a metrico tonelada ti asukar.
Daytoy ti kinumpirmaran ni Press Secretary Trixie Cruz-Angeles iti rabii.
Ni Sebastian ti agserserbi nga undersecretary for operations ken chief-of-staff ni Presidente Ferdinand Marcos Jr. iti DA.
Iti surat ni Sebastian a napetsaan ti Agosto 11, 2022 ken inpatulod na iti opisina ni Atty. Victor Rodriguez, ti executive secretary ti presidente.
Inadmitir ni Sebastian a ti panagpirma na ti Sugar Order 4 ket saan a direksiyon ti Marcos administration iti sugar industry.
Nagkiddaw ti pammakawan gapu ti panagpirma na iti dukomento nga awan ti panangaprubar manipud keno Presidente Marcos.
Kageddan na ti panagyaman ni Sebastian iti pannakaipaay kenkuana ti talek ti presidente ken makapagserbi iti gobyerno.
Immunan nga inreport ni Sec. Cruz-Angeles, a nasuspenso pay laeng dagiti sumagmamano nga opisyal a nakapirma iti Sugar Order 4 bayat a maiyus-uswat ti imbestigasyon.
Inpetteng ni Cruz-Angeles a ni Presidente Marcos ti chairman ti Sugar Regulatory Board rason nga isuna met laeng ti mangisagana ti anyaman a taripnong wenno agenda, rason a ti inaramid da Sebastian ket iligal.
Iti nasao a kontrobersiya ket timmaod kalpasan a linapdan ni Marcos ti panagangkat ti 300,000 metrico tonelada ti asukar a gagem a maipababa ti presyo ken maalay-ayan ti kinakurang na nga agpaot laeng iti panagngudo iti daytoy a bulan ti Agosto.
Iti pannakiinnuman ti Bombo Radyo kadagiti sumagmamano nga stakeholders nangruna iti grupo ti sugarcane, kunada nga awan ti panagkurang ti asukar ken saan da a pabor ti nailungalong a panagangkat.
