LAOAG CITY – Nauram ti agserserbi nga stock ken server room ti reception hall ti Hannah’s Beach Resort and Convention Center iti ili ti Pagudpud.
Segun ken ni Senior Fire Officer II Howell Quepo, ti fire marshal iti BFP Pagudpud, pasado alas tres trenta itay parbangon a nakaawatda ti report manipod iti Philippine Coast Guard Ballaoi Sub-station seknan ti uram.
Gapu iti daytoy, kuna na a dagus a nagresponde dagiti kameng ti BFP ken nasebseseban nga insegida ti apoy.
Inbatad ni Quepo a basar iti palawag dagiti nakakita ti uram, namunganay daytoy iti aircon a posible a naaddan ti problema iti electrical wiring.
Inpakaammo na a karaman a nadadael iti nasao nga uram ket ti computer ken dadduma pay a napapateg a dokumento.
Kabayatanna, kuna ni Quepo nga agtultuloy ti imbestigasyon ken saan pay a masinunuo ti pakabuklan a danyos nga intunda ti nasao nga uram.
