LAOAG CITY – Nagpanawagan ti Commission on Population and Development (CPD) ti alisto a tignay tapno solbaren ti agtultuloy a panagngato ti bilang ti panagsikog dagiti ubbing nga agtawen ti 10 agingga iti 14.
Segun ken ni Commission on Population and Development Spokesperson Myline Mirasol Quiray, basar iti datos ti Philippine Statistics Authority (PSA), ngimmato iti sumurok 3,300 a kaso idi 2023 ti bilang dagiti nasapa a nagsikog iti nasao nga age bracket nga adda ti panagngatona manipud iti sumurok 2,000 a kaso idi 2019.
Iti kabaligtaran, bimmaba met ti bilang ti panagsikog dagiti agtawen ti 15 agingga iti 19 manipud iti 178,000 idi 2019 iti 138,000 idi 2023.
Inbatad ni Quiray a ti seksual a panangabuso ken kinakurang iti edukasion iti reproductive health ti kangrunaan a makitkita a rason iti nasapa a panagsikog.
Inlawlawagna nga adda pay ti nangato nga exposure iti pornograpia ken saan a makonkontrol a social media content kas nayon a peggad kadagiti agtutubo a maikabil iti risgo.
Basar iti World Health Organization, ti nasapa a panagsikog ket narisgo iti salun-at gapu ta dagiti ubing nga ina ket masansan a saan pay a pisikal a nakasagana tapno agpasngay.
Iti datos iti intero a lubong, dagiti kondision ti ina ti maysa kadagiti kangrunaan a rason ti pannakatay kadagiti ubbing nga agtawen ti 15 agingga iti 19.
