LAOAG CITY – Nangiparuk-at ti Executive Order MMK-136 ni Mayor Michael Marcos-Keon mainaig kadagiti pagalagadan iti pannakaikkat ti lockdown iti merkado publiko ditoy ciudad mangrugi intono bigat.
Naipalaon iti EO a masapol nga amin a sumrek iti tiendaan ditoy ciudad ket addaan ti safe pass, maala ti temperatura, nakasuot ti facemask ken suruten ti social distancing.
Masapol a dagiti stall owner iti merkado publiko ket adda ti maipakita da a negatibo ti resulta ti RT-PCR test sakbay a mapalubusan da a sumrek ken agoperar iti tiendaan.
Kabayatanna, dagiti close contact dagiti agpositibo ti covid-19 ket saan a mabalin a sumrek iti tiendaan ditoy ciudad ti Laoag malaksid no nakompleto da ti quarantine procedure.
Mabalakadan pay amin a mapan iti tiendaan a mangitugot ti ballpen tapno adda ti pagsurat iti logbook.
