LAOAG CITY – Inpetteng ti agtagikua iti karinderya iti Barangay San Roque iti ili ti Paoay a namin-ado da a nagsubli iti Treasury Office iti Municipal Hall tapno mapan agbayad ken agipasa para iti requirements iti branch ti karinderya na.
Segun kenkuana, in-assess ti opisina ti bayadan da ngem idi mapanen agbayad ket maipagarop a sabali manen a requirements ti ipaala da kenkuana agingga a nagpatulong da iti abogado ngem kastoy latta ti nagbalin a sitwasyon da.
Inbatad na a nasken kuma a ti maysa a problema ket saan a maikonektar iti sabali a problema tapno naurnos ti saritaan ken awan ti saan a panagkikinnaawatan.
Patyen na a parparigaten laeng ti nasao nga opisina ti maseknan gapo iti maipagarop nga inawagan na a “personal interest”.
Mamati pay ti agtagikua iti karinderya a ti rason ti pannaka-pending ti business permit ket ti saan a pannakaireshistro dagiti dua a branch.
Nupay kasta, kunana nga idi na-compute ti bayadan da ket sabali manen a problema ti tammaod no sadinno a masapol manen ti pirma ti agtagikua iti lote.
Inlawlawag na pay a saan a kayat nga agpirma ti kasinsin na nga agtagikua iti lote gapo ta saan met a maus-usaren ti pasdek panganan.
Kabayatanna, inlawlawag ni Mrs. Melba Bacena, ti Business Permit and Lisencing Officer iti ili ti Paoay a ti main branch ti karinderya iti Barangay San Roque ket kumpleto ti papeles na ken maiyendorso laengen iti Mayor.
Nupay kasta, kuna ni Bacena nga idi maiyendorso kuma daytoy ket adda ti dimmanon a report iti opisina da nga adda pay ti dua a lokasyon a pagop-operaran daytoy.
Gapo iti daytoy, napan da kinita ken kinasarita da ti agtagikua tapno mangala ti busines permit dagiti dua a branches ngem agpapan ita ket saan pay a naka-secure ti maseknan.
Inbatad na a ti nagbalin a problema seknan kadagiti dua a branches ket kasapulan ti kontrata iti agtagikua iti daga ngem awan pay ti naited da iti opisina ti BPLO.
Kunana a kas maiyataday iti Tax Code, sakbay a makaoperar ti anyaman a negosyo ket addaan ti business permit.
Inbaga na a ti rason no apay a napending ti permit ti main branch gapo ta iti panagoperar na ket saan a nakabayad para iti business permit.
Mainaig iti daytoy, kuna ni Bacena a ti singsingiren da ita ket ti panagoperar ti karinderya idi Disyembre 2019 agingga iti Marso 2020, ken ti maysa a branch ken Pebrero agingga iti Marso ita met laeng a tawen.
