LAOAG CITY – Inpakaammo ni Mrs. Rosemarie Jane Agcaoili iti Barangay 28 ditoy ciudad ti Laoag nga isuda ti naggapoan na dagiti karne ti baboy ken processed meat a naikarga iti maysa a delivery van a natiliw iti Bantay, Ilocos Sur.
Maipalagip a ti Barangay 28 ditoy ciudad ti Laoag ket manarinaan ti surveillance na gapu iti African Swine Fever (ASF) virus.
Inlawlawag ni Agcaoili a ti driver ti van a natiliw ket siguden nga agang-angkat ti lako na kadakuada.
Inbaga na a nagorder kadakuada ti maseknan iti biernes ken innala na iti malem ti sabado dagiti nasao a produkto.
Nupay kasta, natiliw ti van iti Bantay, Ilocos Sur no sadinno nga inbilin dagiti otoridad a masapol nga isubli na dagiti nasao a produkto iti nangalaan na nga isu met ti inaramid ti maseknan.
Inbatad ni Agcaoili nga innala da ti inorder ti maseknan ken insubli da pay ti kwarta nga inggatang na, ngem saan latta a nakaliklik gapu ta pinagmulta dagiti otoridad iti Bantay, Ilocos Sur iti 20 ribo a pisos.
Inkalintegan ni Agcaoili a saan nga apektado ti ASF virus ti inlako da gapu ta ti baboy ket ginatang da iti Barangay Araniw ken naparti daytoy iti slaughter house ditoy ciudad ti Laoag.
Innayon na nga adda pay ti sertipikasyon ti kapitan iti naggapoan ti baboy a naparti.
Kabayatanna, inbaga ni Doctor Loida Valenzuela, ti Provincial Veterinarian ditoy probinsya nga apaman a nakita na ti post iti social media ket naawagan ti imatang na gapu iti pannakatiliw ti van a nagkarga kadagiti karne ti baboy ken processed meat ket dagus a nakikoordinar iti Ilocos Sur tapno alaen na ti detalye iti napasamak.
Inpetteng na a dagiti agipuspuslit ti nagduduma a produkto ket agaramid da ti pamuspusan tapno makalusot da uray iti illegal a wagas.
Innayon na a nakikoordinar payen iti slaughter house ditoy ciudad ti Laoag no adda dagiti ini-ikkan da ti shipment gapu ta ammo da a maipawil pay laeng ti agiruwar ti karne ditoy probinsya.
Kuna na pay nga imbestigaren da a naimbag ti naibaga ti naglako ti karne a ti baboy a naparti iti slaughter house ket ginatang da iti Brgy. Araniw ditoy ciudad ti Laoag.
