LAOAG CITY – Inbatad ni Miss Nelly Alnas Cristobal, agtagikua iti maysa a resort and hotel iti ili ti Pagudpud sipud idi Abril ita a tawen ket umabot ti nasurok a 200 a ribo a pisos ti baybayadan na iti kuryente.
Segun kenkuana, ti binayadan na ti kuryente idi Abril ket 220 ribo a pisos ngem napanunot na a possible a ngimmato gapu iti kaado ti guests da iti dayta a gundaway kangrunaan na ket holy week.
Kuna na nga iti sumaruno a bolan ti mayo ket umabot iti 235 ribo a pisos ti binayadan na ti kuryente isut gapuna a naggatang ti solar lights a namnamaen na a makatulong tapno bumaba ti bill da.
Inadmitir na a nasakit ti nakem na ngem napanna latta binayadan.
Nupay kasta, idi naawat na ti bill na ita a bolan ket napanunot na a saanen a maikanatad daytoy gapu manmano laengen ti guest da isut gapuna a saanda unay a makaus-usar ti kuryente.
Inpalgak na a gapu ta awan ti ammo na a pagreklamoan na ket inpost na laengen ti bill da ti kuryente iti facebook.
Inpetteng na a saanna a bayadan ti naudi a bill dan ken ikonkonsiderar na ti panagusar da laengen ti generator.
Innayon na a saan a makadesisyon no paserraan na ti negosyo da gapu iti kangina ti baybayadan da ti kuryente gapu ta adda dagiti empleado da a maapektaran.
Kuna na pay a no bilang matuloy ti panagusar da laengen ti generator ket kasarita da dagiti guests da nga iti aldaw agyan da amin iti ruwar nga isu ti panagdidigus da tapno makainana ti generator.
Mangnamnama ni Cristobal nga aksyunan dagiti opisyales ditoy probinsya kangrunaan na iti biang ti gobernador ti nangato unay a singir ti kuryente ditoy Ilocos Norte.
