LAOAG CITY – Inpetteng ni Mr. Sherwin Guerrero, agtagikua iti maysa a tailoring shop ditoy ciudad ti Laoag a saan na nga intaray ti kwarta nga inisyal a bayad para iti uniporme ti Drum and Lyre Corps ti Plaridel Elementary School, ken saan a napukaw daytoy.
Daytoy ket kalpasan a maak-akusaran ni Guerrero babaen iti post ti maysa a radio station a maipagarop nga intaray na ti agarop 90 a ribo a pisos a bayad para iti nasao nga uniporme.
Segun kenni Guererro, nasakit ti nakem na iti nasao a radio station gapo ta maipagarop a saan a naala ti takder na seknan iti akusasyon kenkuana.
Inpalgak na a gapo iti post ket ado dagiti bashers na rason a naibabain ken pakadadaelan daytoy ti reputasyon na kas maysa a negosyante.
Inlawlawag na nga awan ti nadakamat a nagan iti mismo a post ngem ammon ti kaadoan nga isuna ti nangkontrata iti nasao nga uniporme dagiti miembro ti Drum and Lyre Corps iti nasao a pagadalan.
Mainaig iti daytoy, iti panagturong ti grupo ti Bombo Radyo Laoag iti nasao a pagadalan, inbatad ti Principal a ni Mrs. Marites Pascual nga awan met ti nagbalin a problema ken adda met dagiti uniporme rason a mababain da a mangisursuro no apay a nagbalin nga isyu daytoy.
Kuna pay ni Guerrero a maipaneknek na nga adda ti uniporme ken inusar dagiti estudyante iti dress rehearsal da babaen iti iggem na a video.
Kabayatanna, desidido ni Guerrero a mangipila ti reklamo no siasinno man ti nangipadanon ti nasao nga akuasyon ken iti mismo a radio station.
