LAOAG CITY – Rumrummuar iti panagadal a ti panagtaraken ti pusa ket mabalin a dumoble iti risk ti schizophrenia-related disorders.
Nangisayangkat ti analysis ti Australian researchers ti 17 a panagadal iti napalabas nga 44 a tawen manipud kadagiti 11 a pagilian pakairamanan ti Estados Unidos ken United Kingdom.
Ti schizophrenia ket maysa a klase ti seryoso a mental illness no sadinno ti tao a naapektaran ket naidumduma iti panangalisarna iti realidad.
Nangrugi ti ideya idi 1995 gapu iti maipagarup nga exposure iti parasite a maaw-awagan ti Toxoplasma gondii manipud iti pusa.
Maiyakar ti parasite iti tao iti babaen ti kagat wenno rugit ti pusa nga addaan daytoy.
Ti T.gondii ket mabalin a sumrek iti central nervous system ken posible a makaapektar iti neurotransmitters.
Daytoy a parasite ket adda ti pakainaiganna iti pannakabalbaliw ti personalidad ti maysa a tao kas ti emergence ti psychotic symptoms ken neurological disorders kas ti schizophrenia.
Naammoan a no adda ti taraken a pusa sipod pay idi ubing ti maysa a tao ket nangatngato ti tsansana a maaddaan ti schizophrenia.
Nupay kasta, saan amin a panagadal ket nakitaan daytoy ti koneksion isu nga inpetteng ni McGrath a kasapulan pay ti naun-uneg a panagsukisok tapno mapaneknekan daytoy.
