LAOAG CITY – Maysa nga agtawen iti 10 nga ubing a babai idiay Leicester, United Kingdom ti nakagun-od ti world record gapu iti kinaubingna ket Manager daytoyen iti maysa nga istasion ti radio.
Kinumpirmaran ti records keeping organization a Guinness World Records a ni Martha Sheehan ti baro a record holder ti titulo a “Youngest Person To Manage a Radio Station (female)” gapu ta iti tawenna a 10 ket nakapataray daytoyen ti radio station nga Space Station.
Ti Space Station ket maysa nga Special Radio Station a kukua ti Fun Kids, maysa a radio station para kadagiti agtutubo nga agtawen iti 6 agingga 12. Naipasdek ti Space Station tapno mangtalantan ti science, space ken space exploration. Nairubuat daytoy idi Hunio 8 ken dinutukanda ni Martha kas Manager daytoy.
Iti baet ti tawen ni Martha, daytoyen ti in charge no ania dagiti topics ti matalantan iti Space Station. Malaksid iti daytoy ket karaman isuna iti panag-decide no ania dagiti kanta, advertisements ken jingle ti maipatukar iti istasion.
