LAOAG CITY – Maysa a lola idiay South Korea ti nangpadas nga agbalin a representative ti South Korea iti 73rd Miss Universe pageant.
Dinayaw ti kaadduan ti agtawen iti 80 a lola a ni Choi Soon Hwa kalpasan a nagbalin a finalist iti Miss Universe Korea.
Ti pannakipaset ni Choi ket kageddan ti desision ti Miss Universe Organization nga ikkatenen ti age limit kadagiti agkalikagum nga agbalin a contestant.
Iti baet ti tawenna, kumpiansa ni Choi iti kabaelanna ken magagaran nga ipakita ti naisangsangayan a kinapintas ken talentona.
Naipasngay isuna idi 1943, ni Choi ket maysa a retired hospital caregiver. Iti tawenna a 70 ket ditoy a naduktalanna laeng ti talentona iti panagmodelo no sadinno a na-feature isuna kadagiti sumagmamano a fashion magazine.
Kabayatanna, kalpasan ti naiyuswat a 2024 Miss Universe Korea idi Setiembre 30, napaay ni Choi a mapili kas representative ti South Korea iti 73rd Miss Universe pageant a maisayangkat idiay Mexico.
Naammoan a ni Ariel Han, maysa a 22 years old fashion student ti nagballigi kas Miss Universe Korea.
