LAOAG CITY – Maysa nga agtawen iti 89 nga ama idiay Kobe, Japan ti daydayawen dagiti tattao idi nagbisikleta daytoy manipud iti Kobe a nagturong idiay Tokyo tapno bisitaen ti agtawen iti 61 nga anakna.
Imbes nga aglugan isuna ti bullet train, pinili ni Mitsuo Tanigami nga agbiahe ti 600 a kilometro iti uneg ti siam nga aldaw babaen iti electric-assist bicycle.
Iti baet ti napigsa a tudo ken angin, nagtultuloy isuna usar ti maysa a papel a mapa.
Kalpasan ti siam nga aldaw, nakadanon ni Mitsuo idiay Tokyo idi Marso 25 no sadinno a sinabat isuna ti anakna a ni Naoya.
Ti naidumduma a biahe ni Mitsuo ket nagbalin a pammaneknek nga awan ti katapusan ti sakripisio ken panagayat ti maysa a nagannak.
Iti panagawid ni Mitsuo iti Kobe, naglugan daytoyen ti bullet train ken inbilinna ti bisikletana ken ni Naoya.
