LAOAG CITY – Nagpanawagan ti Commission on Population and Development (CPD) iti panagbiruk a dagus iti solusyon mainaig iti agtultuloy a panagngato ti bilang dagii agsiksikog a babbai nga agtawen ti 10 agingga iti 14.
Segun ken ni Commission on Population and Development spokesperson Myline Mirasol Quiray, basar iti datos ti Philippine Statistics Authority (PSA), ngimmato iti nasurok a 3,300 a kaso idi 2023 ti bilang dagiti nasapa a nagsikog iti nasao nga age bracket.
Kabayatanna, bimmaba met ti bilang dagiti nagsikog nga agtawen ti 15-19, wenno iti 178,000 idi 2019 ket bimmaba iti 138,000 idi 2023.
Dinakamat ni Quiray a ti sekswal a panagabuso ken kaawan ti ammo iti reproductive health ti kangrunaan a rason ti nasapa a panagsikog.
Mainaig iti daytoy, inbatad ti World Health Organization a ti nasapa a panagsikog ket narisgo iti salun-at gapu ta dagiti ubbing nga inna ket saan pay a nakasaga pisikal.
Tapno malabanan daytoy ket ilunglungalong ti Commission on Population and Development ti napigpigsa nga edukasyon iti reproductive health kadagiti pagadalan.
