LAOAG CITY – Natay ti maysa nga ubing gapu iti sakit a dengue iti Barangay 2 ditoy ciudad ti Laoag.
Nabigbig ti biktima a ni Duane Ross Miguel, agtawen ti 10, agad-adal iti Shamrock Elem School ken residente met laeng iti nadakamat a barangay.
Iti eksklusibo nga interview ti Bombo Radyo Laoag iti ama ti biktima a ni Mr. Allan Ross Miguel, inbatad na nga idi mapanna alaen ti anak na iti pages-eskwelaanna iti aldaw idi biernes, Agosto 30 ket agmamayo daytoy isut gapuna nga inbalakad na a saan laengen a sumrek iti malem ngem nagpilit latta ti ubing a napan iti pagadalan.
Kuna na nga idi mapanna sukunen ti malem ket nakabarbaran ti ubing isut gapuna a pinagtumar na ti agas.
Inbatad na nga iti kabigatan na ket awanen ti gurigor ti anak na, ngem iti bigat ti domingo ket nagbakbakwar ti ubing isut gapuna nga inpan na iti Governor Roque Ablan Senior Memorial Hospital (GRASMH) ditoy ciudad ti Laoag.
Iti pannaka-eksamen ti ubing ket umabot ti 257 ti platelet na ngem iti kabigatan na ket nagbalin a 157 ti platelet na.
Segun ken ni Mr. Miguel, ti laeng ibagbaga dagiti doctor kenkuana ket suspected dengu ti sakit ti anak na ken adda dagiti inpatpatumar da a syrup.
Nupay kasta, kalpasan ti tallo nga aldaw ket sabalin ti itsura ti anakna gapu ta nagbalin laengen a15 ti platelet na isut gapuna nga inbilin dagiti doctor nga iyakar da laengen iti Mariano Marcos Memorial Hospital and Medical Center (MMMHMC) idiay ciudad ti Batac.
Iti kaadda da iti MMMHMC ket inbaga kenkuana dagiti doctor nga stage 3 ti sakit a dengue ti ubing isut gapuna nga inderetso da daytoy iti ICU.
Naamoan pay ti ama a Miguel iti ospital idiay ciudad ti Batac a saan koma a rumbeng a pinatumar da ti anak na ti syrup gapu ta agpadpadaran iti uneg na gapu ta nakaron ti sakit na a dengue.
Mamati ni Mr. Miguel nga inaramid amin dagiti doctor iti MMMHMC ti kabaelan da tapno maagasan ti anak na ngem kalpasan ti sumagmamano nga aldaw a kaadda na iti nasao nga ospital ket saanen a kinabaelan ti ubing a nangitunda ti ipupusayna.
Nasakit ti nakem ni Mr. Miguel iti GRASMH gapu ta patienna a saan nga inasikaso a naimbag dagiti doctor ti anak na ken inbilin da laeng nga iyakar nan iti ospital idiay ciudad ti Batac idi makita da a nakaron ti sitwasyon ti biktima.
Innayon ni Mr. Miguel nga asikaswen da pay laeng ti mansayag ken ti pannakaitabon ti anak da sakbay a pagsaritaan da ti asawa na ti rumbeng nga aramiden da, no agpila da ti reklamo kontra iti GRASMH.
Ti biktima ket agmaymaysa laeng nga anak ken ti ina na ket agtrabtrabaho idiay Singapore.
Kabayatanna, naiget a naglikudan ti GRASMH ti alegasyon ti ama a Miguel ken inpasingked ni Dr. Katrina Depona, ti Pediatrician a nangtaming iti ubing nga idi ummuna pay laeng nga aldaw ti biktima iti ospital ket inbagadan a positibo daytoy iti sakit a dengue.
Inpasingked na a saanda a binaybay-an ti ubing gapu ta kanayon ti panangmonitor da kenkuana.
