LAOAG CITY – Natay ti agtawen ti 10 nga ubing a taga Cagayan iti Mariano Marcos Memorial Hospital and Medical Center iti ciudad ti Batac gapu ti maipagarop a sakit a meningococcemia.
Daytoy ti kinumpirmaran dagiti sumagmamano nga opisyal ti nasao nga ospital.
Nupay kasta, inpasingked da a saan a kontaminado ti nasao nga ospital gapu ta nagtalinaed ti pasyente iti isolation area ken dagiti kadwa na iti uneg ket dagiti laeng nangtaming kenkuana a naipaayan ti prophylaxis.
Karaman ditoy dagiti doctor, medical technologists, nurse ken dadduma pay a medical staff a nangkadwa ti pasyente, pakairamanan ti guwardiya tapno malapdan iti panagwaras ti nasao a sakit.
Naamoan nga inbilin ti hospital iti pamilya ti pasyente a maitabon ti bangkay iti las-od ti 12 nga oras gaputa infectious daytoy nu matay ti pasyente a nagsagaba ti nasao a sakit.
Innayon pay dagiti maseknan a naipakat amin a safety measures tapno mapagtalinaed ti kinatalged ti ospital ken awan ti sabali a matay gapu ti nasao a sakit.
