LAOAG CITY – Maysa a lola idiay Japan ti nakagun-od ti world record gapu ta isuna ti kataengan a Pharmacist iti intero a lubong.
Kinumpirmaran ti records keeping organization a Guinness World Records a ni Kesa Hatamoto ti Tokyo ti baro nga akin-iggem ti titulo nga “Oldest Pharmacist (female)” gapu iti tawenna a 101.
Idi ubing pay ni Kesa, arapaapna nga agbalin a mangisursuro ngem ginutigot isuna ti amana nga agbalin a Pharmacist ken dagusna met a sinurot ti kalikagum daytoy.
Kalpasan a nagadal ti kolehio ket nagtrabaho isuna iti maysa a Pharmaceutical Laboratory ngem nagsardeng daytoy a nagtrabaho apaman a nagasawa ken naaddaan ti annak. Tawen 1954 idi agdedision daytoy ken ti misterna a mangipasdek ti bukudda a drug store tapno maaddaanda ti nayon a pamastrekan.
Saan a narigatan a naaddaanda ti kustomer ti negosioda gapu ta isuda laeng ti addaan ti drug store iti lugarda. Malaksid iti agas, aglaklakoda pay ti general merchandise iti puestoda.
Iti agdama, adu ti nangipagarup a managerial position laengen ti ar-aramiden ni Kesa iti drug store-da isu a naruay ti nakigtot no maammoanda nga agtawen daytoyen ti 101 ken isuna ti agtartrabaho kas ti stocking, ordering ken dispatching.
Napalaos ti ragsak ni Kesa iti Guinness title-na. Dagusna nga in-display daytoy iti drug store-da ken mangnamnama isuna a ti titulona ket mapagtalinaed iti naunday a panawen.
