LAOAG CITY – Natiliw ti agtawen ti 14 a maysa a menor de edad iti naiyuswat a drug buy-bust operation dagiti otoridad iti likud ti Marcos Stadium iti bisinidad ti Barangay 3 ditoy ciudad ti Laoag.
Naala iti ikot ti saanen a nainaganan a suspek ti maysa a bassit a ziplock a naglaon ti maipagarop a napagango a marijuana ken ti 500 a pisos a nausar ti operasyon.
Inbatad ni SPO2 Harold Nicolas, team leader iti nangiyuswat ti drug buy-bust operation ditoy ciudad ti Laoag a nabayagen a monmonitoren da ti suspek a menor de edad.
Inlawlawag na a ti nasao a suspek ket karaman kadagiti grupo dagiti agtutubo ditoy ciudad ti Laoag a sipsiputan da gapu iti illegal nga aktibidad da.
Kinumpirmaran ni Nicolas nga iti pananginterview na ti menor de edad ket inadmitir na ti illegal nga aktibidad da.
Inbatad ni Nicolas nga inadmitir pay ti suspek dagiti kakadwa na ken mainaig ti operasyon da.
Gapu ti daytoy, kuna ni Nicolas nga agsapsapol da ti long term solution gapu ta ado unayen dagiti maus-usar nga ubbing.
Innayon na a nasakit para kadakuada ngem masapol nga ipatungpal da ti paglintegan kas ti pannakaipila ti kaso kontra ti natiliw da a menor de edad a naglako iti marijuana.
