LAOAG CITY – Inbatad ni PLt. Rudy James Jacalne, ti hepe iti PNP-Piddig a naurnos ken nakapagsasaritan dagiti karaman iti viral video nu sadino nga adda ti napasamak a panagdangran.
Segun ken ni Jacalne, alas onse ti rabiii ti Agosto 5 idi napasamak ti panagdangran.
Inlawlawagna a basar iti panagimbestigar ti kapulisan, simrek iti maysa a pribado a compound iti Brgy. Loing ti agtawen ti 14 a barito ken adda iti impluwensya ti nasanger.
Inbatad na a dita nga arig a nagiwarwara ti menor de edad ken nagringgor.
Kuna na a dita a nakita dagiti adda iti compound ken isu ti rason a nadanog babaen iti agtawen ti 20 a lalaki.
Gapu iti datoy, inpakaammo ti hepe a dagus a naimbitaran iti kuerpo ti pulisya dagiti agsinumbangir a partido ken natulag met dagitoy nga awan metten ti maipila a kaso.
Mainaig iti daytoy, inbatad ni Jacalne a malaksid kadagiti karaman iti insidente ket naimbitaran pay ti nag-post ti video iti social media tapno mabalakadan seknan ti inaramid na nga addang.
Immuna iti daytoy, kuna ni Jacalne nga awan ti ideya ti nagannak ti menor de edad nga agin-inom ti nasanger.
Kabayatanna, inbunannag ni Jacalne a nu agtultuloy ti kapada nga insidente iti ili ti Piddig ket maisubli ti naiget nga implementasyon ti curfew.
