LAOAG CITY – Posible a mabalod dagiti agtawen ti 15 agingga 17 nga agaramid iti maikanniwas iti paglintegan ditoy Pilipinas.
Daytoy ti kinumpirmaran ni Atty. Domingo “Egon Cayosa, ti dati a Presidente ti Integrated Bar of the Philippines.
Segun kenkuana, nasayaat gapu ta inlawlawag ti Korte Suprema dagiti patakaran a panangdeterminar ti maipataw a pannusa kadagiti menor de edad kangrunaanna dagiti agtawen ti 15 agingga 17 nga aglabsing iti pagalagadan.
Inbatadna a basar iti general rule a no nagbasol ti maysa a menor de edad ket dagiti nagannak kadakuada ti agbayad ti multa wenno maipan iti Department of Social Welfare and Development para iti naan-anay a panangbayabay dagitoy.
Nu pay kasta, basar iti nailanad ti linteg a dagiti agtawen ti 15 agingga 17 nga ammona ti inaramidna ket mabalin a mapatawan ti maiyannatop a pannusa.
Kunana a nagduduma ti interpretasion dagiti psychologist, psychiatrist ken social worker iti panangtingiting dagiti aramid ti maseknan a menor de edad ngem no dadduma ket ti Korte Suprema ti matungpal.
Inpalgakna a masapol ti naiget a panangtingiting ti Korte Suprema kadagiti amin nga anggulo iti napasamak pakairamanan ti sakbay, manarimaan ken idi nalpas ti krimen maibasar iti totality rule iti linteg.
Inlawlawagna a sakbay a maiyatnag ti desision ket kasapulan ti nadagsen nga ebidensia ken aniaman a banag a mangipaneknek a nagbasol ti maseknan.
Innayonna nga adda dagiti gundaway a maus-usar dagiti menor de edad nga agaramid ti nagduduma a klase ti krimen gapu ta ti pagaammo dagitoy ket saanda a maibalod ken madusa.
