LAOAG CITY – Inlungalong ni CIBAC Partylist Rep. Bro. Eddie Villanueva ti House Bill 8260 wenno Social Media Protection for Minors Act a mangipawil kadagiti agtawen ti 16 agpababa a maaddaan ti access iti social media platform ditoy Pilipinas tapno maiyadayo iti negatibo nga epekto dagiti social media.
Inbatad ni Villanueva nga adun a pagilian ti nangipatungpal iti nasao a gakat kas idiay Spain, Australia, France idinto nga iti Indonesia ket rinugiandan ti kapada a probision.
Iti babaen ti gakat, amin nga agtawen ti 16 agpababa ket saan a mapalubosan a maaddaan ti account kadagiti amin a social media platform kas ti Facebook, TikTok ken dadduma pay.
Maobligar dagiti amin a social media platforms a mangi-deploy kadagiti teknolohia tapno ammoen no menor-de-edad wenno saan ti akinkukua ti accounts tapno lapdan daytoy wenno ikkatenen no addan.
Inpaganetget ni Villanueva nga adda ti kasapulan tapno mapatibker ti gakat gapu iti risgo iti pannaka-addict dagiti ubbing iti internet no sadinno a mabalin a ma-expose dagitoy kadagiti violent, sexual content ken iti online exploitation.
