LAOAG CITY – Maysa nga agtawen ti 17 nga agtutubo idiay Utah, Estados Unidos ti natiliw dagiti otoridad kalpasan a namin-adu a nangikapet kadagiti ikan kadagiti Automated Teller Machine (ATM).
Segun iti Provo Police Department, ti saanen a nainaganan nga agtutubo ket namin-13 a nangikapet iti ikan babaen ti duct tape kadagiti nagdumaduma nga Automated Teller Machine ditoy siudad ti Provo kas prank wenno pagraragsakan.
Nangrugi ti pranks idi Agosto 2023 ken indokumento ti suspek iti Instagram account-na babaen ti username a “fish_bandit84.”
Ti nadakamat nga account ket addaan iti 52,000 a followers ken amin a ladawan dagiti lames a naipit iti ATM ket nai-upload ditoy. Agus-usar iti trout, bluegill, bass, catfish, carp ken crappie kadagiti prank-na.
Malaksid iti ATM, inkabil pay ti suspek ti maysa nga ikan iti kotse ti pulis ti Provo Police Department.
Idi Disiembre, nangipatungpal ti Provo Police Department iti search operation tapno maammoanda ti kinasiasino ti user a ni “fish_bandit84.”
Kalpasan a naammoanda ti kinasiasinona, insigida a naipan iti juvenile court ken napilaan ti kaso a dua a misdemeanor counts of property damage.
